پەرتووكەكا جڤاكییە، ژ نڤیسینا (نزار محمد سعید)، چاپا ئێكێ ژێ ل سالا (2011) هاتییە چاپكرن، كۆمەكا گۆتار و ڤەكۆلینایە، ل درێژاهییا قوناغێن دیرۆكا مللەتێ كورد، گەنجینەكا پڕ دەولەمەندی یا سامانێ فولكلۆری هاتییە پێكئینان، وەكو بەرهەمێ زانین و تاقیكرن و سەربۆرێن كور و كچێن ڤی مللەتی د ژیانێدا، بهایێ ڤی سامانی یێ د هندێ دا، كو ژێدەرەكێ پڕ گرنگە، ژ بۆ رۆنكرنا خەلەكێن هندا، ژ ئالییێن جڤاكی، ئابووری، رەوشەنبیری، یێن جڤاكێ كوردی د كەڤندا. كو تێكەلییەكا قاییم، د ناڤبەرا رابردوویێ مللەتی و دەست و دارێ نها تێدا دژیت، پەیدا دكەت، ئەڤ پەرتووكە چەندین بابەتان ب خۆڤە دگریت، وەكی: جانەوەر و دار و رووەك د باوەرییێن مللی دا ل دەڤ كوردان، كار و ئابوور د گۆتنا پێشییاندا، سویند و نفرین و دوعا و ئاخڤتنێن رۆژانە د ژیانا كورداندا، زێدەباری بانگەوازییێن فرۆشیاران و زمانێ ئیشارەتێ.