د ڤێ په‌رتووكێ دا كو به‌حس ل كه‌ڤناتی و ره‌ساناتییا زمانێ كوردی هاتییه‌كرن، بزاڤ بۆ هندێ هاتییه‌كرن كو هه‌ڤبه‌ندییا وێ دگه‌ل زمانێ په‌رتیان ئانكو زمانێ ئه‌شكانی ل سنۆرێ شارستانییه‌تا ئیرانی بده‌ته‌ دیاركرن.
سه‌باره‌ت په‌رتییان به‌ری دامه‌زراندنا ده‌وله‌تا ئه‌شكانی ژبلی ناڤی چو تشتێ دی ده‌رهه‌قی وان نه‌هاتییه‌ گۆتن و تۆماركرن، ژبلی هندێ كو به‌حس ل ده‌ڤه‌ره‌كێ ب ناڤێ (په‌رتووكه)‌ یان (په‌رپ) دهاته‌كرن كو دكه‌ڤته‌ باكۆرێ خوراسانێ و هنده‌ك پارچه‌یێن تركومه‌نستانێ.
ژ ئالیێ كارگێریڤه‌ ده‌وله‌تا په‌رتی ب ده‌وله‌تا شاهنشاهی یا ناڤداره‌ كو بۆ ئێكه‌م جار وان سیسته‌مێ فیدرالی بكارئینایه‌ و وه‌كو زمانێ گۆتن و نڤێسینێ زمانێ گریكی رۆله‌كێ مه‌زن سه‌ر وان هه‌بوویه‌ و وان گرنگی ب زمانێ سریانی و خه‌تێ ئارامی دایه‌ و ل ڤێره‌ دیار دبیت ل سه‌ر ده‌مێ وان سێ زمانێن ژێكدوور هه‌ڤڕكی دگه‌ل ئێك دكر ئه‌و ژی زمانێن (گریكی – سریانی یان ئارامی و په‌هله‌ڤیا ئه‌شكانی) كو كاریگه‌رییا خۆ سه‌ر زمانێ كوردی ژی هه‌تا نوكه‌ هه‌بووینه‌.